إزاي بدأت خدمة فى الكنيسة ؟
أنا كنت بدرس فى المعهد آخر سنة 1995 كنت ساكن بجوار الكنيسة هنا وكنت بواظب مع أبونا أنطونيوس فى الاعترافات وحصلت على إعداد خدام هنا وكنت فى الخدمة إلى سنة 2004. كنت بعمل فى الكنيسة بصفة رسمية في الحسابات إلى أن دخلت فى الكهنوت.
في أي بلد ولدتَ ؟ فى بنى سويف
كان عندك مانع أو الأسرة انك تخدم فى المكان هنا برغم طبيعة المكان ؟
أنا كنت مقيم فى ضواحي بني سويف مش بني سويف نفسها لكن وبعدين مش مهم المكان المهم إن الواحد يحس إنه بيخدم ربنا في المكان اللي بيخدم فيه
كنت بتخدم أى مرحلة في الكنيسة ؟
خدمت فى مدارس الأحد وفي إعدادى وفي الشباب وفي الخرجيين والكورال - ملاك الذبيحة
شفت الناس هنا إزاي فى بداية الخدمة ؟
هو كل مكان بيختلف عن الآخر في طبيعة خدمته، يعني العادات في الجبل غير مصر الجديدة حسب السلوك والطباع، لكن في كل مكان فيه خدمة ربنا هيبقى موجود وهيظهر عمله مش هيفرق المكان
من بدايات خدمتك كنت بتخدم فى الكورال - كورال ملاك الذبيحة - كنت مرنم ؟
أنا كنت بخدم في الكورال، كنت مرنم، علشان كدا كنت في الخدمات الآخرى كنت دايماً في الخدمة الافتتاحية
من أول الأسماء للترشح للكهنوت كان اسم الأستاذ شنودة، كان استقبالك للموضوع ده إزاي؟
شيء طبيعي لما انفتح فى الأول المسئولية مش صغيرة، المسئولية ربنا إللى بيديها وربنا بيعين على أمانتها لأن دي عطية من ربنا، لكن الناس بتحس إن في حد في الظاهر أه الأستاذ شنودة معروف ده خادم لكن دي معايير الناس لكن الموضوع ده حسب إرادة ربنا
أول ما سمعت إن إرادة ربنا اختارت الأستاذ شنودة يبقى كاهن حسيت بإيه وكلمت ربنا وقولتله إيه؟
أكيد قولت لربنا إن دي مسئوليه كبيرة وبتحتاج مجهود مش ذاتي، ده بيبقى حمل بس لو الإنسان بشيله لوحده لكن ربنا هو إللي بيشيله وده شغل ربنا وده تعب ربنا
أعتقد أن قدسك ما عملتش مجهود قوي فى استلام القداس فى فترة التدريب طبعاً ؟
دا طبعاً بسبب وجودي بقرب أبونا أنطونيوس وكنت حافظ بعض الألحان، بس استلام القداس محتاج بعض المجهود لأن كمان إحنا بنستلم القداس كله بالقبطي مافيش حاجة اسمها عربي طبعاً فترة الأربعين يوم إللي في الدير، كنا بنحفظ مع بعض ونراجع مع بعض كانت فترة جميلة جداً، أخدنا مجهود لكن فى الآخر استلمنا القداس ونشكر ربنا بنصليه
لما استلمت الحمل ولقيت ربنا بين ايديك استقبلت الحظة دى إزاي ؟
استلام الحمل دي حاجة كبيرة إنى أنا من شخص عادي أو خادم إنى فجأة أنا إللي بمسك الحمل وأنا إللي بقوم بخدمة القداس أو اشترك فى خدمة القداس
فى مفهوم الكنيسة ربنا بيخدم من خلال الكاهن او بحول الأسرار من خلال الكاهن بس علشان إنى أكون الوسيط أو الداء إللي ربنا بيستخدمها طبعاً كان شعور رهيب أول مرة الموقف كان رهيب مش مجرد خادم بيتناول أو شماس لا أنا العكس
لما دخلت الكنيسة وبقيت مسئول وبقيت حافظ أسرار الناس وشايل أحمالهم، فى سر الاعتراف حسيتها صعبة ولا حسيتها إزاي ؟
أكيد مشاكل الناس تقيلة، الكاهن فى الأول وفي الآخر إنسان، ولما بيشعر بالمشاكل دي بتبقى تقيلة عليه. لكن إحنا بنقول ربنا بيشيل مع الكاهن ربنا بيديله نعمة إنه يقدر يحس بآلام الناس ويشارك في حل مشاكلهم ويصلي من أجلهم لأن كلمة كاهن تعني شفيع، أنا بوصل لربنا طلبات الناس ومشاكلهم ومتاعبهم وبرده بشيل جزء منها لأني إنسان زيهم بس لو شلتها بطريقة آدمية بحتة فى المشاعر الإنسانية هتعب لأنها حمل صعب لكن بقوله يارب انت تقدر عليها علشان كدا أجمل وقت لما الكاهن يقدم فيه طلبته وطلبات الشعب أثناء تقديم الحمل، المشكلة الفلانية للشخص الفلاني انت تقدر تحلها وتستلمها وانت اتصرف
انت عارف ان ليك لقبين ؟
من يومين سمعت الكلام ده ......
اللقب الأول الكاهن اللى صوته حلو، والثانى الكاهن الصغير بمعنى الكاهن صغير السن، بيقولوا عايز تحضر قداس من العمق احضر قداس أبونا شنودة.
حكاية الصوت أنا شخصياً لحن القداس أ اللحن الكنسي بالنسبة ليا تأثير حلو قوي حتى العلماء بيقولوا من الناحية الموسيقية إنه بيبقى ليه تاثير على النفس من جوه بتحرك المشاعر بتتقال ليه وعلشان إيه على مين مش بس الناس تحسبها بصوت أو بشكل لكن يمكن تكون فى مواهبه بس ربنا مش بيحسبها بصوت وفي كل الأحوال قلب الكاهن بيبقى مرفوع جوه القداس بس الناس بسيطة، الصوت إيه والشكل إيه بس مش بيفرق الصوت عند ربنا
طيب دخولك فى كورال ملاك الذبيحة وتدريبات الصوت، كان بالنسبة ليك مفيد علشان الألحان؟
أي تدريب سوى عن خبرة أو بدون خبرة بيفيد. لكن يعتمد على طبقة الصوت، لكن أنا طول فترتي في الدير ممكن أحضر لكن زيي زي كل الآباء هحفظ علشان لازم أنا عايز أحفظ، لكن تقدري تقولي عوامل مساعدة بتمهد شوية.
هنا تم تخصيص مسئوليات لكل أب كاهن بقى مسئول عن جزء، صحيح بيتم المناقشة بينكم لكن قدسك مسئول عن جزء إداري وخدمة المرضى ؟
لا أنا غير مسئول عن الجزء الإداري أنا مسئول عن خدمة المرضى و اخوة الرب والكورال والمسرح لكن لا تفرق إحنا بنتشارك فى كل الخدمات ونأخد رأى بعض يعنى مش بتفرق
في البداية الكنيسة ما كانش فيها خدمة مرضى لأن أبونا أنطونيوس كان لوحده، كيف تم تكوين الخدمة أو إزاي قولت أنا هعمل الخدمة دي ؟
طبعا الفضل لربنا أولا وبعد كدا أبونا أرسانيوس، قدس أبونا كان المؤسس وبعدين أنا كملت معايا اخواتى الخدام من البداية كنا بنروح للناس فى البيوت بناول لقينا إن العدد كبير لأن الشعب هنا كبير فقررنا نعمل يوم روحي، منه ناخد العدد كله ومنه الناس تاخد نعمة حضور الأسرار المقدسة
هو قائم على الناحية الروحية بس ولا الاهتمام الجسدى بالمريض ؟
إحنا فى البداية بنبدأ بالاهتمام الروحي لأن الأهم للأنسان الهدف الروحي وبعدين الهدف الجسدي للمحتاج لكن مرحلة مرحلة وربنا يسدد كل احتياج ..... لكن ببركة ربنا بنقوم بده وبده
